కోహ్లీతో గొడవ ఎఫెక్ట్.. వరల్డ్ కప్ సీన్ రిపీట్.. ట్రావిస్ హెడ్ కుటుంబానికి వేధింపులు!

క్రికెట్ మైదానంలో ఆటగాళ్ల మధ్య జరిగే చిన్నపాటి వాగ్వాదాలు ఒక్కోసారి హ‌ద్దులు దాటి వారి కుటుంబ సభ్యుల వరకు వెళుతున్నాయి. తాజాగా ఆస్ట్రేలియా స్టార్ బ్యాటర్, సన్‌రైజర్స్ హైదరాబాద్ ఆటగాడు ట్రావిస్ హెడ్ విషయంలో ఇదే జరిగింది. 2026 ఐపీఎల్ సీజన్‌లో రాయల్ ఛాలెంజర్స్ బెంగళూరుతో జరిగిన మ్యాచ్‌లో విరాట్ కోహ్లీతో మైదానంలో జరిగిన మాటల యుద్ధం తీవ్ర దుమారం రేపింది. ఈ ఘటన తర్వాత కొందరు భారత క్రికెట్ అభిమానులు సోషల్ మీడియా వేదికగా ట్రావిస్ హెడ్‌ను, ఆయన భార్య జెస్సికాను లక్ష్యంగా చేసుకుని తీవ్రమైన దూషణలకు, వేధింపులకు పాల్పడుతున్నారు.

ఈ ఆన్‌లైన్ దాడులపై జెస్సికా హెడ్ ఆస్ట్రేలియన్ మీడియా సంస్థ 'ది అడ్వర్టైజర్'తో మాట్లాడుతూ తీవ్ర ఆవేదన వ్యక్తం చేశారు. "గత ఏడాది వన్డే వరల్డ్ కప్ ఫైనల్ తర్వాత ఎలాంటి వేధింపులు ఎదుర్కొన్నామో, ఇప్పుడు మళ్లీ అదే పునరావృతమవుతోంది. నిద్రలేచేసరికి నా సోషల్ మీడియా ఖాతాలన్నీ దూషణలతో నిండిపోయాయి. మేం బాగానే ఉన్నాం, కానీ వాళ్లు నా స్నేహితులను, కుటుంబ సభ్యులను కూడా వదలడం లేదు" అని ఆమె ఆవేదన చెందారు.

ఇది మొదటిసారి కాదని, గతంలోనూ ఇలాంటి చేదు అనుభవాలు ఎదురయ్యాయని జెస్సికా గుర్తుచేశారు. 2023 వన్డే ప్రపంచకప్ ఫైనల్, వరల్డ్ టెస్ట్ ఛాంపియన్‌షిప్ ఫైనల్, 2024 బాక్సింగ్ డే టెస్టులో ఆస్ట్రేలియా చేతిలో భారత్ ఓడిపోయిన ప్రతిసారీ తమకు ఇలాంటి బెదిరింపులు వచ్చాయని తెలిపారు. గతంలో తమ చిన్నారి కూతురిని కూడా చంపుతామంటూ బెదిరించారని ఆమె చెప్పిన మాటలు ఈ వేధింపుల తీవ్రతకు అద్దం పడుతున్నాయి.

ఇది క్రీడా స్ఫూర్తి కాదు.. అభిమానుల తీరుపై ట్రావిస్ హెడ్ భార్య ఆవేదన 
అభిమానులు క్రీడలను ఆస్వాదించాలి కానీ, వ్యక్తిగత దూషణలకు పాల్పడకూడదని ఆమె హితవు పలికారు. "ప్రస్తుతం అన్ని క్రీడల్లో మానసిక ఆరోగ్యం, ఒకరినొకరు గౌరవించుకోవడంపై చర్చ జరగడం చాలా ముఖ్యం. ఆటలో ఆవేశం సహజం, కానీ తెర వెనుక ఆటగాళ్లకు కూడా కుటుంబాలు, నిజ జీవితాలు ఉంటాయని గుర్తుంచుకోవాలి. ఈ ఘటన అందరిలో మరింత దయ, ఒకరిపై ఒకరికి మద్దతునిచ్చే స్వభావాన్ని ప్రోత్సహిస్తుందని ఆశిస్తున్నాను" అని జెస్సికా విజ్ఞప్తి చేశారు.

అసలేం జరిగింది?
సన్‌రైజర్స్ హైదరాబాద్‌తో మ్యాచ్‌లో ఆర్సీబీ ఛేజింగ్ చేస్తున్న సమయంలో కోహ్లీ, హెడ్ మధ్య మాటల యుద్ధం మొదలైంది. హెడ్ క్రీజులో ఉన్న కోహ్లీని ఉద్దేశించి, ఇంకాస్త దూకుడుగా ఆడాలని వ్యాఖ్యానించినట్లు సమాచారం. దీనికి కోహ్లీ వ్యంగ్యంగా స్పందిస్తూ, "నువ్వు ఇంపాక్ట్ ప్లేయర్‌గా వచ్చావు కదా, కావాలంటే నువ్వే వచ్చి బౌలింగ్ చెయ్" అని బదులిచ్చాడు. ఆ తర్వాత కోహ్లీ ఔటైనప్పుడు కూడా హెడ్ ఏదో వ్యాఖ్య చేయడంతో వీరి మధ్య ఉద్రిక్తత మరింత పెరిగింది. మ్యాచ్ ముగిశాక ఆటగాళ్లు ఒకరికొకరు షేక్‌హ్యాండ్ ఇచ్చుకునే సమయంలో హెడ్ కరచాలనం కోసం చేయి అందించగా కోహ్లీ అతడిని పట్టించుకోకుండా పక్కకు వెళ్లిపోవడం కెమెరాల్లో రికార్డయింది. ఈ ఘటనే తాజా ఆన్‌లైన్ వేధింపులకు కారణమైంది.